NO LAW o'yinida 3000 nafar NPC va erkin dunyo bo'ladi

The Ascent mualliflari sanalgan Neon Giant studiyasi Unreal Engine 5 dvigatelida yaratilayotgan NO LAW o'yinining texnik imkoniyatlari haqida so'zlab berdi.

The Ascent o'yini bilan tanilgan Neon Giant studiyasi hamda Epic Games kompaniyasi kiberpank uslubidagi NO LAW jangari o'yinining texnik imkoniyatlarini namoyish etdi. Unreal Engine 5 dvigatelining grafik kuchini ko'rsatib beruvchi ushbu loyiha shahar ko'chalarida 3000 ga yaqin NPC obrazlarini jonlantiradi. O'yin 2027-yilda PK va konsollar uchun sotuvga chiqishi rejalashtirilgan.

Erkinlik va harakatlar oqibati

NO LAW birinchi shaxs ko'rinishida o'ynaladi va foydalanuvchilarga ulkan shaharni tadqiq qilishda katta erkinlik taqdim etadi. O'yinchilar yo'lda uchragan istalgan qahramonni yo'q qilishlari mumkin, biroq bunday keskin qadamlar o'yin dunyosida jiddiy oqibatlarga olib keladi. Bundan uch hafta avval studiya o'yinchi qabul qiladigan qarorlar va ularning ta'siriga bag'ishlangan alohida videorolikni ham taqdim etgan edi.

Loyiha dastlab gamescom ko'rgazmasidagi namoyishdan so'ng ko'pchilikda kuchli taassurot qoldirgan. Taxminan 25 kishidan iborat kichik jamoa shahar muhitini yaratishda eng mayda detallar va buyumlargacha alohida e'tibor qaratmoqda. Yangi namoyishning uchinchi daqiqasida o'yin fizikasi hamda zarralar tizimi qanchalik sifatli ishlangani yaqqol ko'rsatilgan.

Unreal Engine 5 texnologiyalari

Dasturchilar shahar chinakam jonli ko'rinishi uchun qancha odam kerak bo'lishi ustida uzoq bosh qotirishgan va yakunda ko'chalarda 3000 atrofida NPC harakatlanishi optimal yechim degan xulosaga kelishgan. Bunday ko'lamdagi olomonni yaratish va murakkab grafikani ta'minlash uchun Unreal Engine 5 dvigatelining quyidagi vositalari qo'llanilmoqda:

• MetaHuman — minglab turli xil qiyofadagi qahramonlarni yaratish tizimi;
• Nanite va Lumen — yuqori aniqlikdagi geometriya hamda dinamik yoritish texnologiyalari;
• Mass va Niagara — katta olomonni boshqarish hamda murakkab vizual zarralar tizimi.