Goddess of Victory: NIKKE kompyuter versiyasi buzib kirildi

Xakerlar Goddess of Victory: NIKKE o'yinining kompyuter launcheriga josuslik dasturini joylashtirdi, Shift Up esa o'yinchilarni xavfdan ogohlantirdi.

Xakerlar Goddess of Victory: NIKKE o'yinining kompyuter versiyasiga zararli skriptlarni kiritishga muvaffaq bo'ldi. Shift Up studiyasi o'yin launcheridagi skript fayllariga begona shaxslar aralashganini tasdiqladi va muammoni bartaraf etuvchi tuzatishni chiqardi.

Hozircha yetkazilgan zarar ko'lami aniq emas. Biroq 27-oktabrdan boshlab ushbu o'yinni ishga tushirgan barcha kompyuterlar xavf ostida qolmoqda. So'nggi haftalarda o'yin sanoatiga qaratilgan kiberhujumlar ko'paygan bo'lib, avvalroq Sony, Bandai Namco va Capcom kompaniyalari ham shunday hujumlardan jabr ko'rgan edi.

Josuslik dasturi qanday ishlagan

Muxlislarning aniqlashicha, 2026-yil 27-sentabrdan beri Level Infinite CDN tarmog'idagi to'rtta JavaScript faylida zararli kod bo'lgan. NIKKE kompyuter launcheri aynan shu fayllarni yuklab olgan. Zararli skriptlar tizimga josuslik dasturini o'rnatib, uni masofadan boshqarish imkonini yaratgan.

Launcher ochiq turgan vaqtda xakerlar o'yinchining kompyuterida istalgan buyruqni bajarishi, har qanday fayllarni o'qishi va o'g'irlashi, shuningdek, ekran tasvirlarini olishi mumkin bo'lgan. Natijada foydalanuvchilarning shaxsiy ma'lumotlari, fayllari hamda pullari xavf ostida qolgan.

Kompyuterni tekshirish va himoyalanish usuli

GitHub platformasida tizim zararlanganini tekshirish bo'yicha maxsus yo'riqnoma e'lon qilindi. Buning uchun o'yin papkasidagi debug.log faylini oddiy matn muharriri orqali ochib ko'rish kerak.

Agar fayl ichida «f2fchan» qatori topilsa, kompyuter zararlangan hisoblanadi. Bunday holatda foydalanuvchilarga barcha parollarni darhol almashtirish va operatsion tizimni qaytadan o'rnatish tavsiya etiladi.