Take-Two rahbari PK hamda konsollarni taqqosladi

Take-Two rahbari Strauss Zelnick kompyuter va konsollardagi o'yin tajribasi deyarli bir xil ekanini hamda FiveM loyihasi daromad keltirayotganini aytdi.

Take-Two kompaniyasi rahbari Strauss Zelnick sarmoyadorlar bilan bo'lib o'tgan uchrashuvda shaxsiy kompyuterlar hamda konsollardagi o'yin jarayoni deyarli farq qilmasligini ma'lum qildi. Shuningdek, u GTA V uchun mo'ljallangan mashhur rolli serverlar yo'nalishi kompaniyaga foyda keltirayotganini tasdiqladi.

Uchrashuv davomida Oppenheimer & Co tahlilchisi Martin Yang kompyuter foydalanuvchilari Grand Theft Auto o'yinini konsol egalariga qaraganda boshqacharoq o'ynashini, bunda ayniqsa rolli serverlar katta o'rin tutishini eslatib o'tdi. Shu sababli mutaxassis kompaniya ushbu platformalar o'rtasidagi farqni qisqartirishni rejalashtiryaptimi, degan savol bilan murojaat qildi.

Platformalar imkoniyati va modifikatsiyalar o'rni

Strauss Zelnick bu savolga javoban har ikki platformadagi umumiy o'yin tajribasi deyarli bir xil ekanini ta'kidladi. Uning so'zlariga ko'ra, bugungi kunda zamonaviy kompyuterlarning texnik imkoniyatlari konsollarnikidan jiddiy farq qilmaydi.

Shunga qaramay, aynan foydalanuvchilar yaratgan modifikatsiyalar GTA V o'yiniga 13 yil davomida o'z mashhurligini saqlab qolishga yordam bergan. Take-Two bunday qo'shimchalarning ahamiyatini juda yaxshi tushunadi va shu maqsadda ko'plab rolli serverlar faoliyat yuritadigan FiveM vositasini sotib olgan.

FiveM daromadi va kompaniya maqsadi

Modifikatsiyalar va ular orqali pul ishlash imkoniyatlari haqidagi savolga javob berar ekan, Zelnick FiveM biznesi daromadli ekanini tan oldi. Uning qayd etishicha, kompaniyaning asosiy vazifasi butun dunyo bo'ylab iste'molchilarga eng yaxshi ko'ngilochar mahsulotlarni taqdim etishdan iborat. Agar jamoa ushbu vazifani uddalasa, loyihalardan daromad olish masalasi o'z-o'zidan hal bo'ladi.