Samsung 31 yil deganda Afrika smartfon bozorida yetakchi bo'ldi

Samsung 1995-yilda Afrika bozoriga kirganidan buyon ilk bor smartfonlar savdosi va daromad bo'yicha mintaqada birinchi o'rinni egalladi.

Samsung kompaniyasi 1995-yilda Afrika bozoriga kirib kelganidan buyon ilk marotaba mintaqada smartfonlar savdosi bo'yicha birinchi o'ringa chiqdi. TechInsights tahlilchilari ma'lumotiga ko'ra, 2026-yilning ikkinchi choragida ishlab chiqaruvchi ham daromad, ham yetkazib berilgan qurilmalar soni bo'yicha bozor yetakchisiga aylandi. Bungacha, yilning birinchi choragida kompaniya faqat tushum hajmi bo'yicha birinchi pog'onada edi.

Bozordagi umumiy pasayish va Samsung o'sishi

E'tiborli jihati shundaki, Afrika smartfon bozori 2026-yilning ikkinchi choragida o'tgan yilning shu davriga nisbatan 16,6 foizga qisqargan. Umumiy pasayishga qaramay, Samsung o'z yetkazib berish hajmini 34,8 foizga oshirishga muvaffaq bo'ldi.

Tahlilchilar hisob-kitobiga ko'ra, 2026-yil yakunlari bo'yicha kompaniya Afrika bozoridagi umumiy daromadning 34,5 foizini va jami yetkazib berilgan smartfonlarning 38,7 foizini egallashi mumkin. Sotilgan qurilmalar soni bo'yicha Samsung ulushi so'nggi yillarda barqaror o'sib bormoqda. Xususan, 2024-yilda bu ko'rsatkich 22,4 foizni, 2025-yilda esa 26,5 foizni tashkil etgan. Shu tariqa, ikki yil ichida kompaniyaning bozordagi ulushi 16,3 foiz punktga ko'payishi kutilmoqda.

Mintaqadagi eng mashhur brendlar

Kompaniya mavqeining mustahkamlanishiga brendning iste'molchilar orasidagi yuqori mashhurligi ham yordam bermoqda. 2026-yilgi Brand Africa 100 tadqiqoti natijalariga ko'ra, Samsung qit'a aholisi eng ko'p afzal ko'radigan brendlar ro'yxatida uchinchi o'rinni oldi. Umumiy reytingda u faqat Nike va Adidas kompaniyalaridan ortda qolgan bo'lsa, smartfon ishlab chiqaruvchilari orasida mutlaq yetakchi deb topildi.