Sony PS5 egalariga konsolni 400 dollargacha sotishni taklif qildi

Sony uzoq vaqt faol bo'lmagan PS5 egalariga o'z konsollarini Back Market platformasi orqali 400 dollargacha sotishni taklif qila boshladi.

Sony kompaniyasi PlayStation 5 konsolidan uzoq vaqtdan beri foydalanmayotgan ayrim foydalanuvchilarga o'z qurilmalarini sotishni taklif qila boshladi. Maxsus almashinuv dasturi doirasida ishlatilmayotgan konsol uchun 400 dollargacha pul olish mumkin. Kompaniyaning o'zi texnikani bevosita sotib olmaydi, balki mijozlarni ishlatilgan va tiklangan elektronika savdosi bilan shug'ullanuvchi Back Market platformasiga yo'naltiradi.

Sotish jarayoni qanday ishlaydi

Foydalanuvchilarga yuborilayotgan xabarlarda PlayStation konsol narxini tezda baholash va uni sotish orqali daromad olishni taklif etadi. Sony barcha jarayon ortiqcha rasmiyatchiliklarsiz va oson o'tishiga va'da bermoqda. Mijozdan faqatgina qurilmaning dastlabki narxini bilish, shartlarga rozilik berish va kelishuvni yakunlash talab etiladi.

Savdo yakunlangach, mablag' to'g'ridan-to'g'ri foydalanuvchi ko'rsatgan bank hisob raqamiga o'tkazib beriladi. Biroq taklif qilinayotgan maksimal 400 dollar miqdoridagi to'lovni olish uchun ma'lum shartlarga javob berish kerak bo'ladi.

Bozordagi vaziyat va o'xshash tashabbuslar

Ushbu tashabbus elektronika narxlarining yuqoriligi hamda ayrim butlovchi qismlarni topishdagi qiyinchiliklar fonida paydo bo'ldi. Hozirgi vaqtda ikkilamchi qurilmalar bozorining ahamiyati ortib bormoqda va ishlatilmay yotgan PS5 konsollarining savdoga qaytishi boshqa o'yinchilarga ushbu qurilmani xarid qilish imkonini beradi.

Ishlab chiqaruvchilar odatda mijozlarning eski qurilmalardan xalos bo'lishidan ko'ra yangi texnika sotilishidan manfaatdor bo'lgani sababli, bu Sony uchun ancha noodatiy qadam hisoblanadi. Shunga qaramay, avvalroq Microsoft kompaniyasi ham xuddi shunday dasturni ishga tushirib, Xbox egalariga o'z konsollarini sotishni taklif qilgan edi.