PlayStation 5 konsolida sun'iy intellekt ishga tushdi

Vzlom qilingan PlayStation 5 konsolida yirik til modellarini ishga tushirish imkonini beruvchi PS5LM Plus ilovasi taqdim etildi.

Dasturchi abhi245y maxsus usulda buzib kirilgan PlayStation 5 konsolida yirik til modellarini bevosita ishga tushirish imkonini beruvchi PS5LM Plus ilovasini taqdim etdi. Ushbu yangi loyiha sun'iy intellekt bo‘yicha muhandis Mert Kobanov tomonidan yaratilgan PS5LM dasturiga asoslangan bo‘lib, asosiy hisob-kitoblarni bajarish uchun qurilmaning grafik protsessoridan foydalanadi. Dastlabki versiyalar asosan markaziy protsessorga tayanib, juda kam hajmdagi ma'lumotlarni qayta ishlagan bo‘lsa, yangi dasturiy ta'minot to‘liq matn generatsiyasini ta'minlay oladi.

Resurslar va unumdorlik ko‘rsatkichlari

Unumdorlikni keskin oshirish uchun dasturchi Mesa loyihasidan AMD RADV drayverini olib, uni konsol arxitekturasiga moslashtirdi va llama.cpp dasturini Vulkan interfeysi orqali ishlashga to‘g‘riladi. Buning natijasida sun'iy intellekt modellari foydalanishi mumkin bo‘lgan xotira hajmi taxminan 6 gigabaytdan 11,4 gigabaytgacha kengaydi. Xotiraning o‘tkazish qobiliyati soniyasiga 448 gigabaytni tashkil etgani holda, 27 milliard parametrli Qwen3.8-27B modeli soniyasiga 20,9 tokenni qayta ishlashga erishdi. Test sinovlari vaqtida qurilmaning grafik protsessori to‘liq quvvat bilan yani 100 foiz yuklangan bo‘lsa, markaziy protsessor atigi 2 foiz yuklamada ishladi.

• Qwen3.8-27B modeli: soniyasiga 20,9 tokengacha tezlik
• Gemma 4 E4B modeli: soniyasiga taxminan 61 token
• Llama 3.2 3B modeli: soniyasiga 124 tokengacha tezlik

Veb-interfeys va xavfsizlik cheklovlari

PS5LM Plus o‘z ichiga sun'iy intellekt bilan muloqot qilish uchun qulay veb-interfeysni olgan va lokal tarmoqdagi 8081-port orqali API xizmatini taqdim etadi. Tizim shuningdek OpenAI hamda Anthropic interfeyslarini qo‘llab-quvvatlaydi, bu esa konsolga OpenCode, Codex va Claude Code kabi dasturlash vositalarini ulash imkonini beradi. Kichikroq hajmdagi modellar esa yanada yuqori natijalarni ko‘rsatib, foydalanuvchilarni hayratda qoldirdi.

Shunga qaramay, tizimning imkoniyatlari konsolning umumiy 16 gigabaytlik operativ xotirasi bilan cheklangan. Dasturni ishga tushirish uchun qurilma dasturiy ta'minotini buzish talab etiladi, bu esa o‘z navbatida qurilmaning o‘zi yoki PlayStation Network tarmoqdagi hisob qaydnomasi bloklanishiga sabab bo‘lishi mumkin.