GTA VI yaratilish tarixi, byudjeti va xodimlar soni

Jurnalist Jeyzon Shreyer GTA VI o'yinining 8 yildan ortiq davom etgan mashaqqatli ishlab chiqilish jarayoni va byudjeti tafsilotlarini ochdi.

Bloomberg nashri jurnalisti Jeyzon Shreyer GTA VI loyihasining tayyorlanish jarayoni va studiya ichki muhiti bo'yicha qiziqarli tafsilotlarni omma e'tiboriga havola qildi. Ma'lum bo'lishicha, Rockstar kompaniyasi o'yin ustida sakkiz yildan ziyod vaqt davomida tinimsiz ish olib borgan, shtat miqdorini deyarli ikki baravarga oshirgan va kutilgan sifat darajasiga erishish uchun reliz sanasini ikki marotaba ortga surishga majbur bo'lgan.

Loyihaning boshlanishi va jamoaning kengayishi

Ushbu ulkan loyiha ustidagi ishlar 2015-yilda Project Americas kod nomi ostida boshlangandi. Dastlabki bosqichda ko'lam ancha kengroq rejalashtirilgan bo'lsa-da, keyinchalik asosiy e'tibor Vice-City va uning atrofidagi hududlarga qaratildi. Ishlab chiqarish jarayonining cho'zilishiga Red Dead Redemption 2 loyihasi, global pandemiya va ichki o'zgarishlar ham o'z ta'sirini ko'rsatdi. Natijada kompaniya xodimlari sonini keskin ko'paytirdi. Masalan, avvalgi mashhur loyiha chiqqan paytda korxonada 2441 nafar xodim faoliyat yuritgan bo'lsa, 2026-yilning avgust oyiga kelib bu ko'rsatkich 12 ta alohida ofisdagi 4711 nafar mutaxassisni tashkil etdi. Rahbariyatning tushuntirishicha, bunday kechikishlar ko'plab personajlar va murakkab animatsiyalarni yaratish uchun resurslarning yetishmasligi bilan bog'liq.

O'yin imkoniyatlari va moliyaviy kutilmalar

Olingan ma'lumotlarga ko'ra, o'yinda Jeyzon va Lusiya birgalikda erkin sayr qilishi, turli mashg'ulotlar bilan shug'ullanishi, do'konlarni talashi va huquq-tartibot idoralaridan yashirinishi mumkin bo'ladi. Bularni amalga oshirish uchun Rockstar mutaxassislari o'ta murakkab sun'iy intellekt tizimlarini ishlab chiqdi. Shuningdek, ijodkorlar oldingi o'yinlardagi o'ziga xos satirani Red Dead Redemption 2 loyihasidagidek realistik qahramonlar obrazi bilan uyg'unlashtirishni maqsad qilgan.

Rockstar hozircha rasmiy xarajatlar miqdorini ochiqlagani yo'q. Biroq jurnalistning hisob-kitoblariga ko'ra, loyiha bir milliard dollardan ham qimmatroqqa tushgan bo'lishi ehtimoldan xoli emas. Moliyaviy tahlilchilar esa sotuvlar boshlanganidan keyingi ilk to'rt oy ichida 40 million nusxa sotilishi va tushum uch milliard dollardan oshib ketishini bashorat qilmoqda. Shu bilan birga, kompaniya keyingi loyiha ustida ishlash shuncha uzoq davom etmasligini va'da qilmoqda, chunki ularda allaqachon tayyor dvigatel, maxsus vositalar, o'n uch yillik tajriba va o'zaro hamkorlikka ulgurgan jamoa mavjud.