s&box muvaffaqiyatsiz chiqdi: Facepunch xatolarni tan oldi

Facepunch Studios rahbari Garri Nyuman s&box loyihasining omadsiz chiqqanini tan olib, o'yinchilarning tanqidiga uchragan qahramon modellarini o'zgartirishini aytdi.

Rust va Garry's Mod kabi mashhur loyihalari bilan tanilgan Facepunch Studios studiyasi o'zining yangi s&box platformasi taqdimoti va undan keyingi jarayonlar muvaffaqiyatsiz chiqqanini ochiq e'lon qildi. Loyiha asoschisi Garri Nyuman jamoa dastlabki bosqichda jiddiy xatolarga yo'l qo'yganini, bu esa hamjamiyatda salbiy fikrlar shakllanishiga olib kelganini tan oldi. Yangi platforma avvalroq Garry's Mod loyihasining ma'naviy vorisi sifatida e'lon qilingan bo'lsa-da, ko'plab foydalanuvchilar tomonidan salbiy kutib olindi.

Tanqidlar va omadsiz aksiya

Auditoriyani jalb qilish va qiziqish uyg'otish maqsadida studiya o'yinchilarga platformani cheklanmagan tarzda sinab ko'rish imkonini beruvchi maxsus aksiya tashkil etdi. Shu davrda onlayn foydalanuvchilar ko'rsatkichi odatdagi 400-500 kishidan qariyb 800 nafargacha ko'tarildi, biroq bu o'sish uzoqqa cho'zilmadi va ko'rsatkichlar tez orada yana pasayishni boshladi. Nyumanning ta'kidlashicha, dastlabki reja e'tiborni tortmasdan asta-sekin rivojlanishdan iborat bo'lgan, biroq kutilmagan muammolar va qattiq tanqidlar barcha ko'priklarni yoqib yuborgan. Jamoa yuzaga kelgan vaziyatga tayyor bo'lmagani va vaziyatni to'g'ri boshqara olmagani ochiq tan olindi.

Qahramon modellari o'zgartiriladi

O'yinchilar tomonidan eng ko'p tanqid qilingan jihatlardan biri bu personajlar modeli bo'ldi. Foydalanuvchilar ularni o'ziga xos bo'lmagan shakllarga o'xshatib, dizaynni keskin qoralashdi. Dastlab bu uslub loyihaga o'ziga xos taniqlilik berishi hamda o'tmishdagi Half-Life 2 va Garry's Mod muhitini eslatishi kutilgandi. Shunga qaramay, jamoa boshqa studiyalar kabi birinchi loyihasini chiqarayotgan kichik jamoa emasligi sababli, bunday vizual yechimlar qattiq qarshilikka uchradi.

Shuni anglagan holda, Garri Nyuman qaysarlik qilishdan foyda yo'qligini tan oldi. Sarflangan vaqt va resurslarga qaramamay, kelgusi oy mobaynida bahsli modellar platformadan olib tashlanadi. Ularning o'rniga to'laqonli inson qiyofasidagi standart personajlar taqdim etiladi. Bu qadam kelgusida yuzaga keladigan tushunmovchiliklar va ortiqcha e'tirozlarning oldini olishga qaratilgan.