Operativ xotira tanqisligi 2028-yilgacha cho'ziladi

Micron kompaniyasi 2027-yilgi operativ xotira zaxiralari sotib bo'linganini va global tanqislik 2028-yilgacha davom etishini ma'lum qildi.

Dunyo bo'ylab operativ xotira bozorida keskin taqchillik saqlanib qolmoqda va bu salbiy tendensiya yaqin yillarda o'zgarmaydi. Micron kompaniyasi o'zining 2027-yilda ishlab chiqaradigan butun operativ xotira hajmini amalda to'liq sotib bo'lganini rasman ma'lum qildi. Bunda kelgusi yil uchun mo'ljallangan mahsulotlar narxi joriy ko'rsatkichlardan sezilarli darajada yuqori etib belgilangan. Kompaniya rahbariyati ta'minotdagi jiddiy cheklovlar va ortib borayotgan talab fondida global tanqislik kamida 2028-yilgacha cho'zilishini qat'iy ogohlantirdi, chunki ishlab chiqarish quvvatlari iste'molchilar ehtiyojini to'liq qoplashga ulgurmayapti.

Bozor nima uchun muvozanatga kela olmayapti?

Micron bosh direktori Sanjay Mehrotra bozor yaqin kelajakda barqarorlashish belgilarini ko'rsatmayotganini aytdi. Mutaxassisning so'zlariga ko'ra, 2027 va 2028-yillar davomida bozordagi talab har doim mavjud taklif hajmidan yuqori bo'lib qoladi, chunki korxona hozircha bozor ehtiyojlarini to'liq qondira olmayapti. Shuningdek, 2028-yilda kompaniyaning yangi zavodlari ish boshlashi rejalashtirilgan bo'lsa-da, bu holat xotira narxlari darhol pasayishiga yoki mahsulotlarning ommaviy ravishda oson topilishiga kafolat bermaydi. Shu bilan birga, zamonaviy HBM xotirasiga bo'lgan talab oddiy DRAM mahsulotlariga qaraganda ancha tez o'smoqda, shuning uchun korxona moliyaviy resurslarni va asosiy e'tiborni aynan shu daromadli sohaga yo'naltirmoqda.

Moliyaviy ko'rsatkichlar va daromadlar sakrashi

Xotira narxlarining yuqoriligi va bozordagi taqchillik Micron kompaniyasining so'nggi moliyaviy hisobotlarida yaqqol namoyon bo'ldi. Oxirgi uch oylik ko'rsatkichlarga ko'ra, korxonaning umumiy daromadi o'tgan davrga nisbatan 83 foizga ko'paygan. Xususan, faqatgina DRAM yo'nalishi bo'yicha tushumlar 90 foizga o'sishni qayd etgan. Shuningdek, kompaniyaning qattiq disklar va saqlash qurilmalari savdosi hajmi 10 milliard dollarga yaqinlashdi. Shunga qaramay, yuqori narxlar va ishlab chiqarishdagi cheklovlar texnologiya bozoriga va yakuniy iste'molchilarga uzoq muddatli ta'sir ko'rsatishda davom etadi.