Fable o'yinining yangi geympleyi tanqidga uchradi

Playground Games Xbox yubileyi munosabati bilan Fable geympleyini ko'rsatdi, biroq o'yinchilar uni Dragon Age: The Veilguard bilan solishtirib tanqid qildi.

Playground Games studiyasi Xbox'ning 25 yilligini nishonlash doirasida Fable o'yinining yangi geympley videosini namoyish etdi. Loyihaning ilk tizeri 2020-yildayoq e'lon qilingani sababli ko'pchilik o'yinchilar relizni uzoq vaqtdan beri kutib kelayotgan edi. Shu bois taqdimot katta qiziqish uyg'otdi, ammo ko'rsatilgan kadrlar barchaga birdek manzur bo'lmadi. Rasmiy YouTube kanalida joylangan rolik 3,6 mingta layk va taxminan 6 mingta dizlayk to'pladi.

O'yinchilar nimalardan norozi?

Namoyishdan so'ng izohlarda tanqidiy fikrlar ko'paydi. Foydalanuvchilar yangi Fable o'yinini muvaffaqiyatsiz chiqqan Dragon Age: The Veilguard hamda Concord loyihalari bilan solishtirmoqda. Ayrim tomoshabinlar o'yinni oldindan omadsizlikka mahkum deb atab, relizdan uch oy o'tgach studiyada xodimlar qisqartirilishi mumkinligini taxmin qilgan. Bundan tashqari, jang sahnalarida dushmanlarni payqash qiyinligi, ular atrofdagi teksturalar orasida ko'rinmay qolayotgani ham alohida tanqid ostiga olindi.

Geympleyda ko'rsatilgan kvest

E'lon qilingan videoda o'yinning kvestlaridan biri qanday o'tilishi ko'rsatilgan. Syujetga ko'ra, Briar Hill qahramoni mahalliy qahramon Arden bilan birga Deepwood ichkarisiga yo'l oladi. Ular Oakshire aholisini bezovta qilayotgan g'alati sehrli hodisalar sababini o'rganishi lozim. Qahramonlar Deepwood hududidagi tabiiy sehr tashqi kuch tomonidan buzilganini aniqlaydi va buning ortida kim yoki nima turganiga ishora qiluvchi izlarga duch keladi.

Chiqish sanasi va nashrlar

Fable o'yinining asosiy relizi 2027-yil 23-fevralga rejalashtirilgan. O'yin Xbox Series X|S konsollari, PlayStation 5 hamda Steam platformasi uchun chiqariladi. Hozirda foydalanuvchilar loyihani Steam'dagi istaklar ro'yxatiga qo'shib qo'yishi mumkin.

Standart versiyadan tashqari, o'yinchilar uchun Premium Edition nashri ham tayyorlangan. Ushbu nashrni xarid qilganlar Fable o'yinini rasmiy chiqish sanasidan besh kun avval o'ynash imkoniyatiga ega bo'ladi. Shuningdek, Premium Edition tarkibiga quyidagilar kiradi:

• Fable Digital Artbook & Soundtrack raqamli albomi va saundtreki;
• relizdan keyin taqdim etiladigan Fable: Order of the Hero kengaytmasi;
• ikkita kosmetik zirh to'plami hamda o'yin ichidagi sovg'alarni o'z ichiga olgan Premium Edition Content Pack.