Euro Truck Simulator 2 uchun yo'lovchi tashish imkoniyati qo'shildi

SCS Software studiyasi Euro Truck Simulator 2 o'yini uchun yangi Coaches qo'shimchasini chiqardi, u endi yuklar bilan birga yo'lovchilarni ham tashishga imkon beradi.

SCS Software studiyasi Euro Truck Simulator 2 o'yini uchun Coaches nomli yirik premium qo'shimchani chiqardi. Shu kungacha faqat yuk tashish bilan cheklangan simulyator endilikda yo'lovchilarni tashish imkoniyatini taqdim etadi. Ushbu yangilanish o'yin mexanikasini tubdan o'zgartirib, foydalanuvchilarga professional avtobus haydovchisi sifatida faoliyat yuritish imkonini beradi.

Yangi transport vositalari va funksiyalar

Qo'shimcha doirasida o'yinchilar uchun xalqaro brendlarning litsenziyalangan avtobus modellari taqdim etildi. Ishlab chiquvchilar o'yinning kabina va salon qismlarini, shuningdek, yo'lovchilar bilan bog'liq yangi detallarni alohida ishlashgan. Hozirgi vaqtda foydalanuvchilar quyidagi avtobus modellarini boshqarishlari mumkin:

• Scania Touring
• Volvo 9700 DD
• MAN Lion's Coach

Kelgusi rejalar

Studiyaning ma'lum qilishicha, Coaches DLC shunchaki alohida qo'shimcha bo'lib qolmaydi. Kelgusida mazkur yo'nalishni yanada rivojlantirish va yangi funksiyalar bilan boyitib borish rejalashtirilgan. Yangilanishlar tarkibiga qo'shimcha litsenziyalangan sayyohlik avtobuslari hamda avtomobilni moslashtirish (kastomizatsiya) uchun yangi imkoniyatlar kiritiladi. Ishlab chiquvchilar yangi kontentni alohida kichik to'plamlar ko'rinishida emas, aynan ushbu dastlabki qo'shimchaning o'zini yangilab borish orqali taqdim etishni maqsad qilgan.