Nintendo Switch 2 uchun 23.5.0 proshivkasini chiqardi

Nintendo Switch 2 konsoli uchun 23.5.0 tizim yangilanishini taqdim etib, SmileBASIC orqali amalga oshiriladigan jeylbreyk usulini yopdi.

Nintendo o'zining Switch 2 konsoli uchun 23.5.0 versiyadagi yangi tizim proshivkasini taqdim etdi. Ushbu yangilanish qurilmani buzib kirish hamda unga norasmiy dasturlarni o'rnatishda qo'llanilgan eng asosiy zaifliklardan birini bartaraf etadi. Endilikda tizim himoyasini avvalgi usul yordamida aylanib o'tishning imkoni yo'q.

SmileBASIC zaifligi va modderlar faoliyati

Yangi apdeyt SmileBASIC o'yiniga asoslangan jeylbreyk usulini to'liq bloklaydi. Mazkur zaiflik konsol egalariga odatda yopiq bo'lgan tizim imkoniyatlaridan foydalanishga yo'l ochib berayotgan edi. Xususan, u orqali foydalanuvchilar quyidagi amallarni bajara olgan:

• tizimda homebrew dasturlarini ishga tushirish;
• o'yinlarni modifikatsiya qilish va ularning ichki fayllarini o'zgartirish;
• o'yinlardan nusxa ko'chirish va fayllarni tizimdan ajratib olish;
• o'yin saqlash fayllarining zaxira nusxalarini yaratish.

23.5.0 versiyasi o'rnatilgandan so'ng, ushbu usul yordamida o'yinlarni ko'chirish va ularning fayllariga o'zgartirish kiritish imkonsiz bo'lib qoldi. Shunga qaramay, bu yangilanish modderlar ishini qiyinlashtirgan bo'lsa-da, tajribalar uchun barcha yo'llarni butunlay yopa olgani yo'q. Kelajakda chiqadigan jismoniy o'yin nashrlari yoki mavjud loyihalarning yangilanishlarida yangi zaifliklar topilishi ehtimoli saqlanib qolmoqda. Shu sababli hamjamiyat Switch 2 himoyasini chetlab o'tishning boshqa usullarini topishi mumkin.

Oddiy foydalanuvchilar uchun o'zgarishlar

Tizim xavfsizligini kuchaytirishdan tashqari, 23.5.0 proshivkasi oddiy foydalanuvchilar uchun ham bir qator o'zgarishlarni o'z ichiga olgan. Jumladan, Nintendo konsolni dastlabki sozlash bosqichidayoq maxsus imkoniyatlar parametrlarini o'rnatish funksiyasini qo'shdi. Boshqa o'zgarishlar haqidagi ma'lumotlarni kompaniya yangilanish tavsifida keltirib o'tgan.