Half-Life 2: Episode Three dastlabki kodlari tarqaldi

Internetda Valve kompaniyasining Half-Life 2: Episode Three o'yiniga tegishli dastlabki kod parchalari va Half-Life 2 ning dastlabki modellari tarqaldi.

Internetda Valve kompaniyasining rasman chiqmay qolgan Half-Life 2: Episode Three o'yiniga tegishli dastlabki kod parchalari va Half-Life 2 ning dastlabki modellari tarqaldi. Mazkur axborot sizdirilishiga Gabe Follower taxallusli datamayner e'tibor qaratdi. Uning qayd etishicha, tarmoqqa Half-Life 2: Episode 3 dastlabki kodining ayrim qismlari chiqib ketgan bo'lib, endi bu materiallar havaskorlar yaratayotgan modifikatsiyalarni yangi bosqichga olib chiqishi mumkin.

Tarqalgan materiallar va modellar tarkibi

Ochiq manbalarga tarqalgan fayllar orasida bir nechta qurol turlari hamda turli dushmanlar ustida o'tkazilgan tajriba namunalari mavjud. Xususan, ushbu kod parchalari ichida Blobulator va Weaponizer kabi ishlanmalar tilga olingan. Dastlabki kodlardan tashqari, ko'p o'tmay internetda Half-Life 2 o'yinining dastlabki modellari ham paydo bo'ldi. Topilgan materiallar orasida, jumladan, chumoli-sherlar qiroli modeli ham borligi aniqlandi.

Hozircha faqatgina ushbu tarqoq qismlar yordamida to'laqonli Half-Life 3 o'yinini yaratish imkoniyatini tasavvur qilish qiyin. Biroq bugungi kunda ishqibozlarda zamonaviy texnologiyalardan foydalanish imkoniyati bor. Jumladan, sun'iy intellekt texnologiyalari ko'magida mod yaratuvchilar o'ynasa bo'ladigan demoversiyani yig'ishlari yoki norasmiy davomiy loyihalarni yaxshilashga xizmat qiladigan foydali materiallarni ajratib olishlari mumkin.

Valve loyihalarining avvalgi sizdirilishi va muxlislar ishlari

Muxlislar ko'p yillardan buyon Half-Life 3 chiqishini kutishmoqda va Valve kompaniyasidan voqealar rivojini davom ettirishni so'rab kelishmoqda. Shunga qaramay, Half-Life 2: Episode Three o'yinining rasmiy talqini haligacha taqdim etilmagan. O'tgan yillar davomida ishqibozlar tomonidan yaratilgan norasmiy davomiy loyihalar paydo bo'ldi. Ularning ayrimlari ssenariynavis Marc Laidlaw tomonidan yozilgan Epistle 3 hikoyasi asosida yig'ilgan edi.

Bu Valve bilan bog'liq yagona axborot sizdirilishi emas. Shu yili avvalroq Portal franshizasining amalga oshmay qolgan prikveli hisoblanuvchi F-stop loyihasining dastlabki kodlari ham ishqibozlar qo'liga tushgan edi. Endilikda yangi topilgan fayllar hamda zamonaviy texnologiyalar yordamida muxlislar uzoq kutilgan loyihani o'z kuchlari bilan yig'ib ko'rish imkoniyatiga ega bo'lishdi.