Vampire: The Masquerade - Bloodlines Android'ga chiqdi

Troika Games studiyasining klassik Vampire: The Masquerade — Bloodlines o'yini muxlislar tomonidan Android tizimiga moslashtirilib, beta-versiyada chiqdi.

Troika Games studiyasining 2004-yilda chiqqan Vampire: The Masquerade — Bloodlines rolli o'yini Android qurilmalari uchun beta-versiyada taqdim etildi. Muxlislar tomonidan yaratilgan ushbu norasmiy port kompyuter uchun mo'ljallangan original o'yin hamda uning xatolarini tuzatuvchi muxlislar patchi asosida yig'ilgan. Loyiha muallifi o'yinni mobil ekranlarga moslashtirib, tarmoqqa joyladi.

Boshqaruv va mobil qurilmalardagi ishlashi

Mobil versiyada o'yin menyusi qaytadan ishlangan bo'lib, sensorli ekran orqali boshqaruv va geympadlar qo'llab-quvvatlovi qo'shilgan. Muallif hozircha minimal tizim talablarini rasman e'lon qilmagan, biroq dastlabki sinovlar o'yinning turli qurilmalardagi samaradorligini ko'rsatib berdi.

• Snapdragon 8 Gen 2 chipli Retroid Pocket 6 konsolida o'yin 1080p formatda va maksimal grafika sozlamalarida 50-60 FPS qayd etdi.
• Dimensity 1100 protsessoriga ega Retroid Pocket 4 qurilmasida o'rtacha sozlamalar va 720p o'lchamda ko'rsatkich 40-60 FPS atrofida bo'ldi.
• Snapdragon 662 chipi va 3 GB tezkor xotirali Galaxy Tab A7 planshetida esa o'yin kirish qismidayoq yopilib ketdi.

Original o'yin haqida

Vampire: The Masquerade — Bloodlines voqealari Los-Anjeles shahrida kechadi. Unda o'yinchi endigina vampirga aylangan qahramon rolini bajaradi va tungi shahardagi hokimiyat uchun kurashga tortiladi. O'yin jarayonida tanlangan klan nafaqat qahramonning qobiliyatlari hamda suhbatdagi javob variantlariga, balki shahar ko'chalarida harakatlanish usuliga ham bevosita ta'sir qiladi.

Masalan, Nosferatu klaniga mansub vampirlar o'zlarining qo'rqinchli tashqi ko'rinishi tufayli yerosti quvurlari orqali yashirinib yurishga majbur bo'ladi. Aks holda ular vampirlarning mavjudligini odamlardan sir tutishga qaratilgan qoidalar to'plami — Maskaradni buzib qo'yishi mumkin.