Masahiro Sakurai o'yin yaratishda AI o'rni haqida gapirdi

Super Smash Bros. va Kirby yaratuvchisi Masahiro Sakurai hozircha generativ AI ishlatmaydi, ammo undan butunlay voz kechish xato bo'lishidan ogohlantirdi.

Kirby va Super Smash Bros. seriyalari muallifi Masahiro Sakurai o'yin sanoatida generativ sun'iy intellektga bo'lgan munosabati haqida gapirdi. Masahiro Sakurai's Thoughts on Games: Final kitobi chiqishiga bag'ishlangan uchrashuvda dizayner hozircha bu texnologiyadan foydalanmasligini, ammo zamonaviy sharoitda uni butunlay e'tiborsiz qoldirish dasturchilarni ortda qoldirib ketishi mumkinligini ta'kidladi.

Nima uchun Sakurai hozircha sun'iy intellektdan foydalanmaydi

Taniqli dizayner hozirgi vaqtda generativ sun'iy intellektdan hatto yangi g'oyalarni izlash uchun ham foydalanmaydi. Xususan, uning Kirby Air Riders loyihasini ishlab chiqish jarayonida ham bu texnologiya umuman qo'llanilmagan.

Sakuraining tushuntirishicha, ishlab chiqarish vazifalarini hal qilish uchun shunchaki to'g'ri so'rovlar yozishning o'zi yetarli emas. Jarayonda loyiha muddatlari, jamoaning imkoniyatlari hamda byudjetni hisobga olish zarur. Hozirda sun'iy intellekt bunday mas'uliyatli vazifalarni ishonib topshirish mumkin bo'lgan darajaga yetmagan.

Grafika yaratishda neyron tarmoqlarni qo'llash masalasiga to'xtalar ekan, mutaxassis ularga hali to'liq ishonib bo'lmasligini va texnologiya ekspluatatsiya quroliga aylanib qolmasligi kerakligini qayd etdi. Ko'p hollarda tajribali xodimlar kerakli ishni sun'iy intellekt yordamisiz, mustaqil ravishda tezroq bajarishadi.

O'yin sanoatidagi qiyinchiliklar va kelajak

Shu bilan birga, dizayner bugungi kunda o'yin yaratish jarayoni tobora qiyinlashib borayotganini tan oladi. Uning baholashicha, Kirby Air Riders ustida ishlash avvalgi Kirby Air Ride o'yiniga qaraganda o'n barobar ko'proq mehnat talab qilgan. Bundan tashqari, hozirgi paytda millionlab nusxada sotilayotgan ayrim loyihalar ham o'z mualliflariga daromad keltirmayapti.

Shu sababli Sakurai texnologiya hali ishonchsiz ekanini ro'kach qilib, generativ sun'iy intellektdan butunlay voz kechishda davom etish raqobatda ortda qolishga olib kelishi mumkinligidan xavotirda. Uning fikricha, yangi vositalarni ikkilanmasdan ishga soladigan studiyalar kelajakda ancha ko'proq o'yin chiqarishga muvaffaq bo'ladi.