Grand Theft Auto V syujetini Android uchun moslashtirishdi

WALID1618Y taxallusli dasturchi Grand Theft Auto V o'yinining syujet kampaniyasini va erkin rejimini Android tizimida ishga tushiruvchi launcher yaratdi.

WALID1618Y taxallusi ostida ijod qiluvchi dasturchi Grand Theft Auto V o'yinining Android tizimiga mo'ljallangan norasmiy versiyasi uchun maxsus launcher taqdim etdi. Ushbu dastur yordamida foydalanuvchilar o'yinning syujet kampaniyasidan o'tishi yoki yakka tartibdagi erkin rejimda Franklin sifatida Los-Santos ko'chalarini darhol tadqiq qilishi mumkin. GTA VI relizi kutilayotgan bir vaqtda bu loyiha mobil qurilma egalariga tanish shaharga qaytish imkoniyatini beradi.

Boshqaruv va grafik imkoniyatlar

Mobil portda sensorli ekran uchun virtual tugmalar hamda tashqi geympadlar qo'llab-quvvatlanadi. Agar smartfonga kontroller ulansa, ekrandagi virtual tugmalar avtomatik tarzda yo'qoladi va tasvirni to'sib qo'ymaydi.

Launcher o'yin jarayonida qurilma holatini kuzatib boradi. Agar kadrlar chastotasi tushib ketsa yoki smartfon qizib ketsa, dastur tasvir sifatini mustaqil ravishda pasaytiradi. Shuningdek, so'nggi yangilanishlarda dasturchi AMD FidelityFX RCAS filtrini qo'shdi. Bu texnologiya tasvir o'lchamlari pasaytirilgan holatda ham rasmning tiniqligini oshirishga xizmat qiladi.

Ishlash ko'rsatkichi va texnik talablar

O'tkazilgan sinovlardan birida Franklin bilan shahar bo'ylab erkin harakatlanish vaqtida o'yin 32-34 FPS ko'rsatkichini qayd etgan. Biroq bu natijani to'liq baholash qiyin, chunki muallif sinov aynan qaysi smartfon modelida va qanday ekran o'lchamlarida o'tkazilganiga aniqlik kiritmagan.

Loyihani smartfonda ishga tushirish uchun foydalanuvchilardan quyidagi texnik xususiyatlar talab etiladi:

• 64-bitli ARM protsessori
• Vulkan texnologiyasini qo'llab-quvvatlaydigan grafik tezlatkich (GPU)
• Kamida 8 GB tezkor xotira (RAM)
• Taxminan 15 GB bo'sh doimiy xotira