Huawei HarmonyOS tizimli HM650 shaxsiy kompyuterlarini ko'rsatdi

Huawei kompaniyasi Kirin X90 chipi va HarmonyOS operatsion tizimida ishlovchi ilk stol kompyuterlari — HM650 turkumini rasman namoyish etdi.

Huawei kompaniyasi o'zining HarmonyOS operatsion tizimida ishlovchi HM650 stol kompyuterlari turkumi haqida batafsil ma'lumot berdi. Bu ishlab chiqaruvchining Windows o'rniga to'liq xususiy tizimga ega bo'lgan ilk shaxsiy kompyuterlaridir. Yangi qurilmalar asosan korporativ mijozlar hamda tijoriy foydalanish uchun mo'ljallangan.

Yangi oiladan standart HM650, HM650g hamda kuchaytirilgan HM650g High-Performance Edition modellari joy oldi. Kompyuterlarning barchasi Xitoy bozorida 1-dekabrdan sotuvga chiqadi.

Texnik xususiyatlar va Kirin X90

Barcha yangi kompyuterlar uchun Kirin X90 chipi (SoC) asos qilib olingan. Eng yuqori konfiguratsiyadagi model 10 yadroli protsessor, 24 GB tezkor xotira, 512 GB hajmli SSD hamda 2 TB doimiy xotiraga ega qattiq disk (HDD) bilan jihozlangan.

Bazaviy talqinlarning texnik imkoniyatlari quyidagicha:

• 8 yoki 10 yadroli Kirin X90 protsessori;
• 16 GB tezkor xotira;
• 256 GB dan 512 GB gacha bo'lgan SSD xotira;
• Ayrim komplektatsiyalarda qo'shimcha 1 TB hajmli HDD va ichki Wi-Fi moduli.

Narxlar va modellar

Standart Huawei HM650 kompyuterlarining narxi tanlangan xotira va protsessor turiga qarab 7199 yuandan 10 499 yuangacha (1100–1500 dollar) etib belgilangan. Biroz arzonroq HM650g seriyasi esa xaridorga 6899 yuandan 7699 yuangacha tushadi.

Shuningdek, 10 yadroli Kirin X90 chipi, 16 GB tezkor xotira va 512 GB SSD bilan ta'minlangan HM650g High-Performance Edition talqini 7199 yuanga baholangan. Xitoyda yangi kompyuterlar savdosi 1-dekabr kuni boshlanadi.