Goddess of Victory: NIKKE launcherida zararli kod aniqlandi

Goddess of Victory: NIKKE o'yinining PC launcheri orqali bir hafta davomida zararli kod tarqalgani tasdiqlandi va mualliflar uzr so'radi.

Goddess of Victory: NIKKE o'yinining PC talqini ustida ishlovchi koreyalik jamoa rasmiy launcher orqali foydalanuvchilar kompyuterlariga zararli kod tarqalganini tasdiqladi. Begona shaxslar tomonidan qo'shilgan ushbu xavfli dastur 27-oktabrdan 4-noyabrgacha bo'lgan davrda taxminan bir hafta davomida o'yinchilar qurilmalarini zararlagan. Mualliflar yuzaga kelgan holat uchun uzr so'rab, xavfsizlik choralarini kuchaytirishga va'da berishdi.

Himoya tizimi va foydalanuvchilarga tavsiyalar

Hodisadan so'ng o'yin mijoziga yangi tekshiruv vositasi qo'shildi. Endi dastur har safar ishga tushganda fayllarni zararli kod bor-yo'qligiga tekshiradi va ruxsatsiz o'zgarishlar aniqlansa, foydalanuvchiga darhol xabar beradi. Jamoaning ta'kidlashicha, hozirda launcher xavfli qismlardan butunlay tozalangan va to'liq himoyalangan.

Shuningdek, rasmiy saytda 27-oktabrdan 4-noyabrgacha bo'lgan oraliqda o'yinni ishga tushirgan foydalanuvchilar uchun maxsus yo'riqnoma e'lon qilindi. Mualliflar ushbu davrda o'yinga kirgan barcha o'yinchilarga o'z parollarini, shuningdek, foydalanilgan API kalitlari hamda kirish tokenlarini almashtirishni tavsiya qilmoqda.

Kompensatsiya va o'yinchilar e'tirozi

Zarar ko'rgan foydalanuvchilarga tovon sifatida gacha tizimida 20 ta bepul urinish taklif etildi. Biroq ko'plab o'yinchilar bunday kompensatsiyani kompyuterlarning zararlanishi kabi jiddiy xavfsizlik muammosiga umuman mos emas deb hisoblab, ushbu qarordan norozi bo'lishdi.