Honor 700 smartfonlari Snapdragon 8 chiplarini oladi

Honor 700 va Honor 700 Pro smartfonlari Snapdragon 8s Gen 4 va Snapdragon 8 Elite Gen 5 chiplari, orqa ekran hamda 200 MP kamera bilan taqdim etiladi.

Honor kompaniyasi noyabr oyida taqdim etilishi kutilayotgan Honor 700 smartfonlar turkumini chiqarishga tayyorlanmoqda. Xitoylik insayder Digital Chat Station Weibo sahifasida ma'lum qilishicha, yangi qator o'z narx segmentida yagona bo'lib, birdaniga ikkita Qualcomm Snapdragon 8 seriyali protsessor bilan jihozlanadi. Oddiy modelga Snapdragon 8s Gen 4, kuchliroq Pro versiyasiga esa Snapdragon 8 Elite Gen 5 (yoki Snapdragon 8 Gen 5) o'rnatiladi.

Ushbu turkum haqida rasman 3-noyabr kuni Honor marketing bo'yicha direktori Guan Haitao e'lon qilgan edi. U yangi qurilmalarni kompaniya raqamli qatorining yangi avlodi deb atab, uchta asosiy yo'nalishga urg'u berdi: flagman darajasidagi kameralar, sun'iy intellektning yangi imkoniyatlari va brendning an'anaviy ustunliklarini saqlab qolish. Hozircha smartfonlarning aniq texnik xususiyatlari rasman ochiqlanmagan.

Modellar va qo'shimcha ekran

Dastlabki ma'lumotlarga ko'ra, yangi qatordan uchta model o'rin oladi: Honor 700 Vitality Edition, Honor 700 va Honor 700 Pro. Ularning barchasi Xitoyning 3C regulyatori sertifikatidan o'tgan. Standart va Pro versiyalar ingichka romli, 6,57 dyuymli va 1,5K aniqlikdagi tekis OLED ekranlar bilan ta'minlanishi kutilmoqda.

Qurilmalarning yana bir o'ziga xos jihati orqa paneldagi kameralar bloki hududiga joylashtirilgan taxminan 1,72 dyuymli qo'shimcha ekran bo'ladi. Foydalanuvchilar u orqali vaqt, ob-havo va bildirishnomalarni ko'rishi, musiqani boshqarishi hamda asosiy kamerada selfi tushayotganda uni vizir sifatida ishlatishi mumkin.

Kamera va batareya imkoniyatlari

Insayderning ta'kidlashicha, yuqori unumdorlik, kattalashtirilgan akkumulyator, periskop obyektiv, flagman kamera imkoniyatlari va orqa ekran uyg'unligi ushbu sinfda raqobatchilarga deyarli imkon qoldirmaydi. Mish-mishlarga qaraganda, turkumdagi smartfonlar quyidagi ko'rsatkichlarga ega bo'ladi:

• Barcha modellarda 200 MP aniqlikdagi asosiy kamera;
• Honor 700 Pro versiyasida teleobyektivli modul tarkibida qo'shimcha 50 MP sensor;
• Turkumda maksimal sig'imi 9000 mA/soatgacha yetadigan akkumulyator;
• Pro-versiya uchun 50 Vt quvvatli simsiz va teskari simsiz quvvatlash texnologiyasi.

Ma'lumot o'rnida, Digital Chat Station avvalroq Xiaomi 15 va Xiaomi 15 Pro xususiyatlarini birinchi bo'lib aniq aytgan edi. Shuningdek, u Realme GT 7 Pro yorqin Samsung ekranini olishi va Dimensity 9400 chipi Snapdragon 8 Elite protsessoridan oldin chiqishi haqida to'g'ri xabar bergan.