Huawei HarmonyOS tizimli ilk stol kompyuterini taqdim etadi

Huawei 5-noyabr kuni Kirin X90 protsessori va HarmonyOS operatsion tizimida ishlovchi ilk Huawei HM650 stol kompyuterini rasman namoyish etadi.

Huawei kompaniyasi 5-noyabr kuni o'zining HarmonyOS operatsion tizimi boshqaruvida ishlovchi birinchi stol kompyuterini taqdim etishga tayyorlanmoqda. Huawei HM650 deb nomlangan yangi qurilma kompaniyaning xususiy Kirin X90 protsessori negizida qurilgan. Shu tariqa ishlab chiqaruvchi an'anaviy Windows kompyuterlariga muqobil bo'ladigan, to'liq o'z protsessori hamda operatsion tizimiga asoslangan mustaqil stol platformasini bosqichma-bosqich shakllantirishni maqsad qilgan.

Kirin X90 protsessori va HM650g texnik xususiyatlari

Yangi Huawei HM650 stol kompyuterining apparat asosi sifatida kompaniya tomonidan yaratilgan Kirin X90 chipi tanlangan. Ishlab chiqaruvchining ta'kidlashicha, qurilmada uzoq davom etadigan yuqori yuklamalar vaqtida ham barqaror ishlashni ta'minlaydigan sovitish tizimi qo'llanilgan. Ushbu tizim kompyuterning haddan tashqari qizib ketishi hamda protsessor chastotalarining pasayib ketishining oldini olishga xizmat qiladi.

Kompaniya yangi kompyuter faqatgina kundalik ofis vazifalari uchungina emas, balki ancha murakkab jarayonlarga ham mos kelishini mo'ljallamoqda. Xususan, qurilma katta hisoblash resurslarini talab qiladigan muhandislik loyihalash ishlari, modellashtirish hamda dasturlash kabi yo'nalishlarda samarali qo'llanilishi mumkin.

Huawei rasmiy qo'llab-quvvatlash sahifasida allaqachon HM650g modelining xususiyatlari paydo bo'ldi. E'lon qilingan ma'lumotlarga ko'ra, ushbu kompyuter 16 GB tezkor xotira va doimiy xotiraning bir nechta variantlariga ega bo'ladi. Qurilmaning batafsil konfiguratsiyalari, narxlari hamda sotuvga chiqish muddatlari 5-noyabr kungi taqdimot vaqtida ochiqlanishi kutilmoqda.

HarmonyOS dasturiy ekotizimi va moslashtirilgan ilovalar

Yangi kompyuter namoyishi bilan bir vaqtda Huawei o'z dasturiy ekotizimini rivojlantirish borasida muhim ko'rsatkichga erishganini ma'lum qildi. Hozirga kelib HarmonyOS operatsion tizimining kompyuterlar uchun mo'ljallangan talqiniga moslashtirilgan ilovalar soni 21 000 tadan oshgan. Bundan tashqari, kutilayotgan yangiliklar qatoridan HarmonyOS tizimining korporativ versiyasi ham o'rin olgan.

Kompyuter tizimi uchun moslashtirilgan dasturlar foydalanuvchilarning barcha asosiy ishlash ssenariylarini qamrab oladi. Ular orasida quyidagi yo'nalishlar uchun mo'ljallangan ilovalar mavjud:

• ofis ishlari;
• sun'iy intellekt;
• ta'lim;
• ko'ngilochar dasturlar;
• kontent yaratish.