Madusan buklanadigan smartfoni videoda namoyish etildi

Shimoliy Koreyaning Madusan brendiga mansub buklanadigan smartfon ilk bor jonli videoda ko'rsatildi va uning texnik xususiyatlari ma'lum bo'ldi.

X ijtimoiy tarmog'ida Shimoliy Koreyaning Madusan brendiga tegishli buklanadigan smartfon ishlayotgani aks etgan video e'lon qilindi. Kadrlarda qurilma ochilib, koreys tilida sana ko'rsatilgan katta ichki ekran namoyish etiladi. Smartfonning orqa panelida esa uchta kamera joylashgan.

Avvalroq NK TechLab tahlilchilari Madusan 2222 modeli haqida ma'lumot bergan edi. Taxminlarga ko'ra, bu mamlakatda sotuvga chiqqan kitob shaklidagi ilk buklanadigan smartfon bo'lib, u Honor Magic V2 RSR negizida yaratilgan. Biroq videoda aynan shu model ko'rsatilgani hozircha aniq emas.

DPRK OS tizimi va aloqa cheklovlari

NK TechLab ma'lumotlariga ko'ra, Shimoliy Koreya smartfonlari Android tizimining DPRK OS deb nomlangan o'zgartirilgan talqinida ishlaydi. Qurilmalarda simsiz tarmoq sozlamalari cheklangan bo'lib, bir qator texnik cheklovlar mavjud:

• xorijiy SIM-kartalar qo'llab-quvvatlanmaydi;
• oddiy Wi-Fi tarmoqlariga ulanish imkoni yo'q;
• Mirae davlat tarmog'iga faqat maxsus ilova orqali kiriladi;
• mahalliy Kangsong mobil tarmog'i 4G standartida ishlaydi.

Madusan 2222 haqidagi materiallardan birida valyuta ko'rsatilmagan holda 2000 narxi qayd etilgan. NK TechLab mutaxassislari bu summa AQSh dollarida ekanini taxmin qilmoqda.

Mahalliy bozordagi boshqa buklanadigan modellar

Madusan kompaniyasi buklanadigan qurilmalarni kamida 2024-yildan beri ishlab chiqaradi. Uning vertikal shakldagi 1005 modeli Xitoyning Doogee V Flip Pro apparati asosida qurilgani aniqlangan.

Bozorda yana bir mahalliy brend — Phurunhanal ham paydo bo'ldi. Kompaniya 26-oktabrda ochilgan kuzgi xalqaro tovarlar ko'rgazmasida Phurunhanal 2026 smartfonini taqdim etdi. Bunday qurilmalar avval mamlakat rahbariyati vakillarida kuzatilgan bo'lsa, endi o'ziga to'q aholi uchun mo'ljallangan texnikalar qatoridan ham joy olmoqda.