Nvidia o'z dokonidan GeForce RTX 5080'ni olib tashladi

Nvidia rasmiy dokonidan GeForce RTX 5080 videokartasini sotuvdan oldi va hozirda platformadagi eng kuchli modellar qatoriga GeForce RTX 5070 Ti chiqdi.

Nvidia kompaniyasi o'zining rasmiy internet-do'konidan GeForce RTX 5080 videokartasini butunlay olib tashladi. Avvalroq brendning asosiy flagmani bo'lgan RTX 5090 ham xuddi shunday tarzda savdodan g'oyib bo'lgan edi. Hozirda platformada sotuvda qolgan eng quvvatli grafik karta GeForce RTX 5070 Ti hisoblanadi.

Narxlarning keskin o'sishi va taqchillik

RTX 5080 modeli savdodan yo'qolishidan oldin AQSh bozorida uning narxi keskin qimmatlashgan edi. Ayrim chakana savdo tarmoqlarida ushbu videokartaning qiymati 2000 dollardan oshib ketdi, bu esa hatto RTX 5090 uchun belgilangan dastlabki tavsiya etilgan narxdan ham yuqori edi. Mutaxassislarning fikricha, bunday holat omborlardagi zaxiralar tugab borayotganini ko'rsatadi, garchi kompaniya hozircha model ishlab chiqarilishi to'xtatilganini rasman e'lon qilmagan.

Yangi 24 GB versiya haqidagi mish-mishlar

Ushbu o'zgarishlar fonida tarmoqda yangi versiyadagi RTX 5080 videokartasi tayyorlanayotgani haqida xabarlar tarqaldi. Taxminlarga ko'ra, yangi qurilma 24 GB xotiraga ega bo'lishi mumkin. Dastlabki ma'lumotlarga tayanilsa, uni 2026 yilning dekabr oyigacha chiqarishlari kutilmoqda. Hozircha yangi modelning aniq nomi noma'lumligicha qolmoqda, u RTX 5080 Super deb nomlanishi yoki boshqacha atalishi mumkin.

• GB203-450 grafik protsessori
• Yuqori taktik chastotalar va tezkor xotira
• Kengaytirilgan xotira o'tkazish qobiliyati va quvvat limiti
• 16 GB o'rniga 24 GB video xotira

Xotira hajmining 24 GB ga oshishi ushbu grafik kartani nafaqat o'yinlar, balki sun'iy intellekt modellari bilan ishlash uchun ham yanada jozibador qilishi kutilmoqda. Biroq narx masalasi ochiqligicha qolmoqda, chunki oddiy RTX 5080 ning narxi hozirning o'zida 2000 dollarga yetgan bo'lsa, potentsial yangi versiya bundan ham qimmatroq bo'lishi ehtimoldan xoli emas.