Microsoft DirectX Raytracing yangilanishini taqdim etdi

Microsoft 2018-yildan beri DirectX Raytracing texnologiyasining eng yirik yangilanishini e'lon qilib, o'yinlarda grafika unumdorligini oshiruvchi funksiyalarni qo'shdi.

Microsoft kompaniyasi 2018-yildan buyon DirectX Raytracing texnologiyasi uchun eng yirik yangilanishni taqdim etdi. DirectX 12 Agility SDK 1.722 tarkibiga kiruvchi yangi dasturiy ta'minot o'yinlardagi nurlarni kuzatish jarayonini sezilarli darajada tezlashtirishga qaratilgan funksiyalarni o'z ichiga oladi. Hozircha dastlabki versiya sifatida taqdim etilgan bu yangilanish kelgusida o'yin sanoatidagi grafika imkoniyatlarini yangi bosqichga olib chiqishi kutilmoqda.

Klasterli geometriya va PTLAS qanday ishlaydi?

Mazkur yangilanish ikkita asosiy texnologiyaga tayanadi: Clustered Geometry va Partitioned Top-Level Acceleration Structures, qisqacha PTLAS. Klasterli geometriya murakkab uch o'lchamli modellarni kichik guruhlarga ajratadi. Har bir bunday guruh ko'pi bilan 256 tadan uchburchak va cho'qqilarni o'z ichiga oladi. Natijada o'zgarishlar sodir bo'lganda butun tuzilmani qaytadan qurish shart emas, balki mavjud kichik qismlardan qayta foydalanish mumkin bo'ladi. PTLAS esa bu yondashuvni butun sahna bo'ylab tatbiq etib, GPU faqat o'zgargan hududlarni yangilashini ta'minlaydi va chipdagi yuklamani kamaytiradi.

Qurilmalar ko'magi va sinov natijalari

Microsoft ushbu texnologiyaning imkoniyatlarini Radeon RX 9070 video-kartasida amalda namoyish etdi. Masalan, an'anaviy usulda ishlov berilgan sahna soniyasiga atigi 1.2 kadr ko'rsatgan bo'lsa, yangi klasterli geometriya yordamida bu ko'rsatkich 79 kadargacha oshdi. Albatta, bu barcha o'yinlarda tezlik shunchalik keskin o'sishini anglatmaydi, biroq resurs talab qiluvchi funksiyalarning og'irligini sezilarli darajada kamaytiradi. Shuningdek, mazkur yangilanishga Nvidia RTX Mega Geometry yondashuvi ham integratsiya qilindi. Ushbu funksiyalar uchun yangi uskuna sotib olish talab etilmaydi: Nvidia barcha GeForce RTX kartalari uchun, AMD o'z navbatida RX 9000 seriyasini, Intel esa Arc B kartalari va Core Ultra 200V hamda Series 3 protsessorlaridagi o'rnatilgan grafikalarni qo'llab-quvvatlashini ma'lum qildi.