Phantom Blade Zero xakerlar tomonidan buzib ochildi

Yangilangan Denuvo himoyasiga qaramay, Phantom Blade Zero o'yini xakerlar tomonidan buzildi va Steam'da 450 mingdan ortiq o'yinchini to'pladi.

Oktabr oyining so'nggi kunlarida shaxsiy kompyuterlar va PlayStation 5 konsollarida sotuvga chiqqan Phantom Blade Zero loyihasi qisqa vaqt ichida katta e'tiborni tortdi. Yangi jangari o'yin yaratuvchilari o'z mahsulotini piratlikdan saqlash maqsadida so'nggi paytlarda ko'p muhokama qilinayotgan Denuvo himoya tizimining eng yangi versiyasi bilan ta'minlagan edi. Biroq bu kuchaytirilgan himoya ham o'yinning ilk kunlardayoq xakerlar nishoniga aylanishi va internetda tarqalishining oldini ola olmadi.

Yangi himoya qanday chetlab o'tildi?

Himoya tizimini yaratuvchilar yaqinda uni yanada kuchaytirgan edi, shuning uchun ilgari o'yinlarni qaroqchilik versiyada tarqatishda qo'llanilgan odatiy gipervizor usuli bu safar dastlab ishlamagan edi. Shunga qaramamay, ARTIFACT laqabli xaker yangi yondashuvni topib, eksperimental tarzdagi dasturiy yechimni taqdim etdi. Ushbu maxsus sozlangan gipervizor yordamida yangilangan Denuvo himoyasini chetlab o'tish imkoni tug'ildi va ayrim foydalanuvchilar loyihani shaxsiy kompyuterlarda muvaffaqiyatli ishga tushirishdi.

Biroq xakerning o'zi bu yechim hali to'liq sinov bosqichidan o'tmagani va xavfli ekanidan ogohlantirdi. Unga ko'ra, dasturdan foydalanish jarayonida operatsion tizimning to'satdan ishdan chiqishi hamda kompyuterda jiddiy xatoliklar yuzaga kelish xavfi mavjud. Shuningdek, odatdagidek, himoyani chetlab o'tish uchun shaxsiy kompyuterning asosiy xavfsizlik funksiyalarini vaqtincha o'chirib qo'yish talab etiladi.

Steam platformasidagi yuqori natijalar

Himoya bilan bog'liq ushbu vaziyatlar va noqulayliklar S-GAME Studio tomonidan ishlab chiqarilgan loyihaning mashhurligiga salbiy ta'sir ko'rsatmadi. Aksincha, o'yin Steam platformasida juda yuqori ko'rsatkichlarni qayd etib, barchani ajablantirdi. Ayni paytda mazkur loyihaning bir vaqtning o'zida o'ynayotgan foydalanuvchilar soni 450 ming nafardan oshib ketdi va bu ko'rsatkich bosqichma-bosqich o'sishda davom etmoqda.

• Steam foydalanuvchilari tomonidan qoldirilgan ilk sharhlar ijobiy maqomga ega bo'lib, umumiy reyting 81 foizni tashkil etmoqda.
• Ayrim o'yinchilar loyihaning ayrim bosqichlari haddan tashqari oson tuzilganidan noroziligini bildirishgan.