Pokémon turnirida yomon hid sababli mojaro yuzaga chiqdi

Baltimore Regional Championships 2026 musobaqasida ishtirokchining o'ta kuchli yomon hidi boshqa o'yinchilarni bezovta qilib, mojaro kelib chiqdi.

AQShda bo'lib o'tgan yirik kibergoh va stol usti o'yinlari turnirlaridan birida yuzaga kelgan g'ayrioddiy holat jamoatchilik e'tiborini tortdi. Baltimore Regional Championships 2026 musobaqasida ishtirok etgan o'yinchilardan birining shaxsiy gigienaga e'tiborsizligi boshqa qatnashchilar uchun jiddiy sinovga aylandi.

Teksaslik VGC o'yinchisi va mintaqaviy chempion Donhoon Yum o'zining boshidan kechirgan o'ta noqulay va yoqimsiz vaziyat haqida ommaga oshkor qildi. Uning so'zlariga ko'ra, Baltimor shahrida o'tgan chempionat vaqtida uning yaqin atroflarida o'tirgan boshqa noma'lum ishtirokchi chidab bo'lmas darajada badbo'y hid tarqatgan. Bu holat shu darajada kuchli bo'lganki, o'yinchining qusishiga sabab bo'lgan. Yum va uning do'stlari ushbu chidab bo'lmaydigan hid sababli o'yin davomida normal darajada o'z diqqatini jamlab, raqobatlasholmaganini ta'kidlashgan.

Hakamlarga qilingan shikoyat va noma'lum ishtirokchi

Vaziyat jiddiylashgach, jabrlangan o'yinchi va uning do'stlari musobaqa hakamiga rasman shikoyat qilishgan. Biroq shikoyat qilingan o'yinchining shaxsi ommaga e'lon qilinmagan, shuningdek, hakamlar tomonidan qanday choralar ko'rilgani haqida hech qanday ma'lumot mavjud emas. Mutaxassislar va o'yinchilar bunday holatlar yirik oflayn turnirlarda qatnashchilarning qulayligiga putur yetkazishini ta'kidlashmoqda.

Rasmiy qoidalar nima deydi?

Ta'kidlash joizki, shaxsiy gigienaga rioya qilish shunchaki odob qoidasi emas, balki rasmiy reglament talabidir. Play! Pokémon Tournament Rules Handbook qo'llanmasiga ko'ra, barcha tashrif buyuruvchilar va turnir ishtirokchilari ijtimoiy jihatdan qabul qilinadigan shaxsiy gigiena darajasini saqlab turishi shart.

Agar ushbu qoida buzilsa, musobaqa tashkilotchilari ishtirokchining tadbirda qolish-qolmasligini hal qilish vakolatiga ega. Qoidalarni buzgan shaxslar turnir hududidan butunlay chetlatilishi mumkin, yuzaga kelgan shunday insidentlar esa darhol Pokémon Organized Play tashkilotiga taqdim etilishi shart.