007 First Light o'yini uchun yirik yangilanish taqdim etildi

IO Interactive studiyasi 007 First Light uchun 1.3.0 versiyali yangilanishni chiqardi, u yangi rejimlar va turli kontentlarni o'z ichiga oladi.

IO Interactive studiyasi shpionlik ekshani hisoblangan 007 First Light loyihasi uchun 1.3.0 raqamli yirik yangilanishni omma e'tiboriga havola etdi. Extended Operations deb nomlangan bu bepul versiya o'yinchilarga keng ko'lamli yangi kontentlar va o'yin jarayonini boyituvchi qator imkoniyatlarni taqdim etadi.

Yangi rejimlar va o'ta qiyin daraja

Asosiy yangiliklardan biri syujet kampaniyasi yakunlangandan keyin ochiladigan «Yangi o'yin+» rejimi bo'ldi. Endi foydalanuvchilar sarguzashtni tajribali agent sifatida boshqatdan boshlashlari mumkin. Bunda maxsus «Garderob» orqali kiyimni jarayon davomida o'zgartirish va missiyani kerakli nazorat nuqtasidan boshlash imkoniyati paydo bo'ldi. Shuningdek, jihozlarni keyingi bobni kutmasdan, bevosita topshiriq vaqtida almashtirish funksiyasi qo'shildi. Tajribali o'yinchilar uchun esa dushmanlar tezroq aniqlaydigan, ko'proq zarar yetkazadigan va resurslarni kamaytiradigan «00» darajasidagi eng yuqori qiyinchilik joriy etildi. Shuningdek, o'yinga to'laqonli fotorejim ham qo'shildi.

TacSim faolliklari va yangi manzillar

TacSim faolliklari ham sezilarli darajada boyitildi. Valhalla Protocol bosqichida o'yinchilar pulemyot va raketa qurilmalari bilan jihozlangan Aston Martin Valhalla avtomashinasida Slovakiya hududi bo'ylab harakatlanib, o'z haydash ko'nikmalarini namoyish etadilar. Jungle Heist deb nomlangan ikkinchi bo'lim esa foydalanuvchilarni Vetnamdagi The Pearl mehmonxonasiga qaytarib, sirli vilyaga kirish va seyfdan qimmatli hujjatlarni olib chiqish vazifasini yuklaydi. Har safar bu amaliyot o'zgacha sharoitlarda o'tadi.

Qo'shimcha bonuslar va jangovar o'zgarishlar

• MI6 bosh qarorgohida yashaydigan va o'yinchilar silashi mumkin bo'lgan Jak laqabli buldog iti.
• Observant Spy, Leisure Beam hamda First Class deb nomlangan uchta yangi kiyim turi.
• 1-noyabrgacha IOI akkauntini o'yinga ulab olish mumkin bo'lgan Grey Standard kostyumi.
• 1-oktyabrdan 16-oktyabrgacha davom etadigan Twitch Drops aksiyasi doirasidagi One More buyumi.
• Qayta yuklash, nishonga o'tish, tashlash va qurol almashtirish animatsiyalari yaxshilandi, shuningdek, bosh qahramonni qirg'oq chetidan pastga itarib yuborish imkoniyati qo'shildi.