Samsung Galaxy S26 smartfonlari narxi butun dunyo bo'ylab oshdi

Samsung kompaniyasi xotira narxining qimmatlashishi fonida AQSh, Yevropa va Xitoy bozorlarida Galaxy S26 seriyasidagi qurilmalar narxini oshirdi.

Samsung kompaniyasi Galaxy S26 flagman seriyasidagi smartfonlar narxini o'zgartirishni davom ettirmoqda. AQSh va Yevropadagi qimmatlashuvdan so'ng, bu o'zgarishlar Xitoy bozoriga ham yetib keldi. Narxlarning global miqyosda oshishiga asosiy sabab sifatida DRAM xotirasi qiymatining o'sishi ko'rsatilmoqda.

Xitoy bozoridagi narxlar

Xitoyda Galaxy S26 12/256 GB versiyasi 6999 yuandan 7799 yuangacha qimmatlashdi, bu 11,4 foizlik o'sishni bildiradi. Galaxy S26+ modeli uchun 12/256 GB konfiguratsiyasi 1000 yuan yoki 12,5 foizga qimmatlagan bo'lsa, ushbu modelning 12/512 GB talqini 10,4 foizga oshdi. Galaxy S26 Ultra 12/256 GB esa 9999 yuandan 1000 yuan qimmatlashib, 10 foizga qimmatroq sotila boshladi.

• Galaxy S26: 7799 yuandan boshlanadi
• Galaxy S26+: 8999 yuandan boshlanadi
• Galaxy S26 Ultra: 10 999 yuandan boshlanadi

Shuningdek, xitoylik xaridorlar uchun 16 GB va 1 TB xotiraga ega konfiguratsiya 1800 yuanga qimmatlashib, 13 999 yuanlik eski narxga nisbatan 12,9 foizga oshgan. Biroq Samsung rasmiy saytida maxsus kuponlarni taqdim etishda davom etmoqda va ular yordamida ayrim modifikatsiyalarni 5999 yuandan boshlab xarid qilish imkoni saqlanib qolgan.

AQSh va Yevropadagi o'zgarishlar

Boshqa hududlarda ham narx siyosati sezilarli o'zgargandi. AQShda 256 va 512 GB xotirali barcha Galaxy S26, S26+ hamda S26 Ultra versiyalari 100 dollarga qimmatlashgan edi. Bu konfiguratsiyalarga qarab 7,7 foizdan 11,1 foizgacha o'sishni anglatadi. Istisno tariqasida Galaxy S26 Ultra 1 TB modeli narxi 1799,99 dollardan 1999,99 dollargacha, yani 200 dollarga yoki 11,1 foizga oshdi.

Yevropada esa asosiy Galaxy S26 (256 GB) 1000 yevrodan 1100 yevroga (10 foiz), S26+ modeli 1250 yevrodan 1350 yevroga, Galaxy S26 Ultra 1 TB esa 1920 yevrodan 2150 yevroga, deyarli 12 foizga qimmatlagan edi.