Capcom ID xavfsizlik buzilishiga uchradi: 11 milliondan ortiq ma'lumot sizdi

Capcom tizimiga qilingan kiberhujum oqibatida millionlab foydalanuvchilarning shaxsiy ma'lumotlari xavf ostida qolgani ma'lum bo'ldi.

O‘yin sanoatining taniqli vakili Capcom o‘zining tarmoq tizimlarida jiddiy xavfsizlik muammosi yuzaga kelganini tasdiqladi. Kompaniya ma’lumotlariga ko‘ra, 22-oktabr kuni noma’lum shaxs Capcom ID xizmatiga ruxsatsiz kirishga muvaffaq bo‘lgan va natijada millionlab foydalanuvchilarning shaxsiy ma’lumotlari xavf ostida qolgan. Hozirda mazkur holat yuzasidan maxsus tekshiruv ishlari olib borilmoqda.

Qaysi ma'lumotlar sizib chiqqan?

Ma’lum bo‘lishicha, kiberhujum oqibatida jami 11,7 millionta akkaunt zarar ko‘rgan. Ziyon yetgan ma’lumotlar qatoriga foydalanuvchilarning elektron pochta manzillari, akkaunt ochilgan sana va oxirgi marta tizimga kirilgan vaqtlar, shuningdek, tarmoqqa kirish chastotasi hamda oxirgi seans davomida ishlatilgan IP-manzillar kiritilgan.

Shu bilan birga, jabrlanganlarning kichik bir qismi uchun yanada batafsil ma'lumotlar oshkor bo‘lgan. Xususan, aniq 43 ta akkaunt bo‘yicha shaxsning tug‘ilgan sanasi, jinsi, mamlakat yoki hududi hamda o‘yinchi taxallusi kabi shaxsiy tafsilotlar ham tajovuzkorlar qo‘liga o‘tgan. Biroq kompaniya rasmiylari bank kartalari va har qanday to‘lov ma’lumotlari butunlay xavfsiz saqlanayotganini va ularga hech qanday zarar yetmaganini qat'iy ta'kidladi.

Parollar va ko‘rilgan choralar

Mutaxassislar tekshiruvi davomida xaker foydalanuvchilarning to‘g‘ridan-to‘g‘ri parollarini qo‘lga kiritmagani aniqlangan. Shunga qaramamay, jinoyatchi 196 ta akkauntning parolini o‘zgartirishga ulgurgan. Xavfsizlikni ta’minlash maqsadida Capcom darhol ushbu akkauntlar uchun parollarni avtomatik ravishda qayta tiklab, ularning boshqalarga o‘tib ketishining oldini oldi.

Hozirda kompaniya xavfsizlik tizimlarini yanada kuchaytirish ustida ishlamoqda. Rahbariyat sodir bo‘lgan noxush holat uchun foydalanuvchilardan uzr so‘rab, kelgusida bunday holatlar takrorlanishining oldini olish uchun barcha zarur choralar ko‘rilishini va’da qildi.