Hindiston Starlink interneti ustidan nazorat o'rnatmoqchi

Hindiston hukumati SpaceX kompaniyasiga tegishli Starlink sun'iy yo'ldosh interneti trafigini kuzatish uchun maxsus uskunalar o'rnatishni talab qilmoqda.

Hindiston hukumati Elon Musk'ga tegishli SpaceX kompaniyasiga qarashli Starlink sun'iy yo'ldosh interneti faoliyati ustidan qattiq nazorat o'rnatishni rejalashtirmoqda. The Economic Times nashrining xabar berishicha, mamlakat rasmiylari xizmatning to'laqonli ishga tushishini cheklashi mumkin bo'lgan yangi shartlarni ilgari surmoqda.

Maxsus uskunalar va monitoring talablari

Yangi talablarga ko'ra, Starlink Hindistondagi barcha yer usti stansiyalariga internet trafigini doimiy kuzatib boruvchi maxsus uskunalar o'rnatishi shart bo'ladi. Ushbu tizim ma'lumotlarni uzatish tezligidagi bir tomonlama cheklovlarni aniqlash hamda davlatga satelit aloqasi ishini to'liq nazorat qilish imkoniyatini beradi. Ayni paytda SpaceX mamlakatda 20 ta shunday stansiyani barpo etgan. Kompaniya bu obyektlarda foydalanuvchilar ma'lumotlarini himoya qilish tizimlari mavjudligini ta'kidlasa-da, hukumat qo'shimcha choralarni talab qilmoqda.

Qiyin kechayotgan muzokaralar va rad etilgan arizalar

Starlink Hindiston bozoriga kirishga 2021 yildan buyon intilib kelmoqda. O'sha yili SpaceX mahalliy filialini ochgan edi. O'tgan yilning iyul oyida kompaniya sun'iy yo'ldosh internetini taqdim etish uchun dastlabki lisenziyani qo'lga kiritgan edi. Biroq 2026 yil boshida Nyu-Deli rasmiylari kompaniyaning ikkinchi avlod sun'iy yo'ldosh tarmog'ini kengaytirish bo'yicha arizasini rad etdi. Bunga xavfsizlik standartlariga rioya etilmagani va mamlakatda taqiqlangan chastota diapazonlaridan foydalanish niyatida bo'lgani sabab qilib ko'rsatildi.

BMT ma'lumotlariga ko'ra, Hindiston aholisi qariyb 1,48 milliard nafarni tashkil etadi va bu hududni dunyodagi eng ko'p aholili davlatga aylantiradi. Shu bois mazkur davlat Starlink uchun eng yirik va muhim bozorlardan biriga aylanishi kutilmoqda. Qat'iy tartibga solish siyosati esa xizmatning mamlakatda rasman faoliyat boshlash muddatini yana-da cho'zib yuborishi mumkin.