Samsung Galaxy S27 smartfonlari ertaroq taqdim etiladi

Samsung kompaniyasi Galaxy S27 flagman smartfonlarini 2027-yil boshida, odatdagidan ertaroq namoyish etishi mumkinligi ma'lum bo'ldi.

Samsung kompaniyasi navbatdagi flagman smartfonlari turkumi – Galaxy S27 chiqarilish grafigini o'zgartirishni rejalashtirmoqda. Insayderlarning ma'lumotlariga ko'ra, yangi qurilmalar 2027-yilning yanvar oyi boshida taqdim etilishi mumkin. Bu esa oldingi avlod modellari bilan solishtirganda bir necha hafta erta sodir bo'lishini anglatadi.

Bunday muddatlar kompaniya tarixidagi dastlabki davrlarni eslatadi. Masalan, Galaxy S21 2021-yilning 14-yanvarida chiqqan bo'lsa, keyingi yillarda taqdimotlar biroz keyingiga surilgandi. Xususan, Galaxy S25 modellari 2025-yilning 22-yanvarida, Galaxy S26 esa 2026-yilning 25-fevralida omma e'tiboriga havola etilgandi.

To'rtta model va Exynos 2700 chipi

Kelgusi flagmanlar liniyasiga to'rtta qurilma kirishi kutilmoqda. Bular sirasiga Galaxy S27, S27+, S27 Pro hamda eng ilg'or Galaxy S27 Ultra modellari kiradi. Mutaxassislar kompaniya allaqachon asosiy butlovchi qismlarni aniqlab olganini va ishlab chiqarish masalalarini hal qilganini ta'kidlashmoqda.

Tarqalgan ma'lumotlarga ko'ra, butun Galaxy S27 seriyasi Samsung tomonidan ishlab chiqilgan Exynos 2700 chipida ishlaydi. Bu holat hatto Galaxy S27 Ultra modeliga ham taalluqli bo'lib, qurilmaning aksariyat hududlardagi versiyalarida aynan shu protsessor o'rnatilishi kutilmoqda.

Insayderlarning oldingi prognozlari

Bunday o'zgarishlar va texnik xususiyatlar haqidagi tafsilotlar tarmoqda taniqli insayderlar Lanzuk va Schrodinger tomonidan e'lon qilindi. Lanzuk bundan avval ham Samsung mahsulotlari bo'yicha bir necha bor aniq bashoratlar qilgani bilan tanilgan ishonchli manbalardan biridir.

Xususan, ushbu insayder Galaxy S24 Ultra modeli titan ramkaga ega bo'lishini, bazaviy versiyalar esa alyuminiyda qolishini oldindan aytgan edi. Shuningdek, u Galaxy S25 ekranining o'lchami 6,2 dyuymdan 6,36 dyuymga kattalashishini taqdimotdan yarim yil oldin xabar qilgan edi. Shu bilan birga, u Galaxy S26 seriyasida 3 nanometrli Exynos chiplari bilan yuzaga kelgan muammolar sababli kompaniya barcha hududlarda Snapdragon protsessorlariga o'tishini ham oldindan ma'lum qilgan edi.