LG kompaniyasi AQShda sun'iy intellekt markazlari uchun zavod quradi

LG Electronics AQShda sun'iy intellekt ma'lumotlar markazlari uchun chillerlar ishlab chiqaruvchi yangi zavod qurishga 111 million dollardan ortiq mablag' yo'naltiradi.

LG Electronics kompaniyasi sun'iy intellekt ma'lumotlar markazlari uchun sovutish uskunalarini ishlab chiqarish hajmini kengaytirishga qaror qildi. Bu borada AQSh hududida yirik zavod qurilishi boshlanishi ma'lum qilindi. Yangi korxona zamonaviy infratuzilma uchun maxsus chillerlar ishlab chiqarishga ixtisoslashtiriladi.

Moliyalashtirish va hududiy joylashuv

Ushbu loyihani amalga oshirish uchun jami 150 milliard von, yani taxminan 111,7 million dollar miqdorida sarmoya kiritilishi ko'zda tutilgan. Mablag'larning asosiy qismi AQShda yangi korxonani barpo etishga sarflanadi. Zavod Virjiniya shtatining Vindzor shahrida qad rostlaydi. Ishlab chiqarish hududi taxminan 170 ming kvadrat metrni tashkil etib, shundan binolar ostidagi qism 30 ming kvadrat metrga teng bo'ladi.

Texnik xususiyatlar va muddatlar

Yangi zavodda ma'lumotlar markazlarining kuchli ishlaydigan uskunalaridan hosil bo'ladigan ortiqcha issiqlikni samarali chiqarib yuboruvchi yirik havo chillerlari ishlab chiqariladi. Mazkur korxonaning rasman ish boshlashi 2027 yilning ikkinchi yarmiga mo'ljallangan. Ishlab chiqarish quvvatlarini bevosita AQShda joylashtirish orqali kompaniya shimoliy amerikalik buyurtmachilarga tayyor mahsulotlarni tezroq yetkazib berish hamda mahalliy operatorlarning talablariga operativ tarzda moslashish imkoniyatiga ega bo'ladi.

Mazkur tashabbus LG kompaniyasining chipdan chillergacha deb nomlangan keng ko'lamli strategiyasining muhim tarkibiy qismi hisoblanadi. Brend serverlarning kichik qismlaridan tortib to yirik binolarni sovutish tizimlarigacha bo'lgan barcha bosqichlarni o'z ichiga olgan to'liq yechimlar ekotizimini yaratishni rejalashtirgan. Chillerlar bilan bir qatorda, LG sovitish suyuqligini taqsimlash bloklari bo'lgan CDU texnologiyalarini ham faol rivojlantirib bormoqda.